កំពង់ចាម : ថ្ងៃទី១៦ ខែឧសភា ឆ្នាំ២០២១ រដ្ឋបាលខេត្តកំពង់ចាម បានប្រកាសរកឃើញវិជ្ជមានកូវីដ-១៩ ចំនួន១០នាក់ (ស្រុកបាធាយ ០៦នាក់, ស្រុកស្រីសន្ធរ ០១នាក់, ស្រុកស្ទឹងត្រង់ ០១នាក់ ស្រុកព្រៃឈរ ០១នាក់ និងស្រុកកងមាស ០១នាក់) និងករណីជាសះស្បើយចំនួន២៨នាក់ ក្នុងថ្ងៃទី១៦ ខែឧសភា ឆ្នាំ២០២១។ តាមសេចក្ដីប្រកាសរបស់រដ្ឋបាលខេត្តសូមប្រជាពលរដ្ឋរស់នៅភូមិចុង និងភូមិសំបូរ ឃុំសំបូរ ស្រុកបាធាយ, ភូមិត្នោតលើ ឃុំឬស្សីស្រុក ស្រុកស្រីសន្ធរ, ភូមិប៉ប្រក ឃុំសូភាស ស្រុកស្ទឹងត្រង់, ភូមិត្រពាំងជីនាង ឃុំល្វា ស្រុកព្រៃឈរ និងភូមិកងតាណឺងទី៦ ឃុំកងតាណឺង ស្រុកកងមាស បងប្អូនប្រជាពលរដ្ឋ រស់នៅក្នុងខេត្តកំពង់ចាមអំពីករណីរកឃើញវិជ្ជមានកូវីដ-១៩ ចំនួន១០នាក់នេះ។
រដ្ឋបាលខេត្ត បានបន្តថាដោយឡែក ករណីជាសះស្បើយក្នុងថ្ងៃទី១៦ ខែឧសភា ឆ្នាំ២០២១ មានចំនួន២៨នាក់ (បូកយោងចំនួន១០៥នាក់)។ អ្នកជំងឺទាំង២៨នាក់ ត្រូវបានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានវីរុសកូវីដ-១៩ ចំនួន០២លើក និងត្រូវបានអនុញ្ញាតឱ្យចេញពីមន្ទីរពេទ្យមេគង្គកំពង់ចាម។
រដ្ឋបាលខេត្តកំពង់ចាម បន្តទៀតថាប្រសិនបើប្រជាពលរដ្ឋក្នុងស្រុកនេះមានរោគសញ្ញា ផ្ដាសាយ ក្អក ហៀរសំបោរ ឈឺបំពងក ថប់ដង្ហើម ឬរោគសញ្ញាសង្ស័យផ្សេងៗ សូមទៅពិនិត្យសុខភាពនៅតាមមន្ទីរពេទ្យ ឬមណ្ឌលសុខភាព ដែលស្ថិតនៅជិតកន្លែង ដែលបងប្អូនស្នាក់នៅ និងរាយការណ៍ជូនអាជ្ញាធរមូលដ្ឋានជាបន្ទាន់ សូមផ្ដល់ព័ត៌មានមកកាន់លេខទូរស័ព្ទ ០៧០ ៨២៨ ៧៨៨ / ០១២ ៧៣៦ ៧៥៥៕
